Mami po ti nuk ke frikë, se të ndodh edhe ty si në Paris? Nuk ke frikë se të gjuajnë?

Të dashura nena!
Ju lutem, ndoshta mund t'ju duket e tepruar, por dua me të vërtetë t'i jap tim biri 12 vjeç një përgjigje, që t'i heqë frikën nga sulmet terroriste!
Sot në mëngjes para se të shkonte në shkollë më pyeti i trembur, mami po ti nuk ke frikë, se të ndodh edhe ty si në Paris? Nuk ke frikë se të gjuajnë?
Më besoni nëna nuk dija çfarë t'i thoja dhe i thashë jo nuk kam frikë, por do flasim për këtë pasi të kthehesh nga shkolla!
Ju lutem nena, sidomos ndonjëra nga ju që eshte psikologe apo studion për psikologji a mund të na japë një përgjigje me të cilën t'i shpjegojmë ashtu si duhet fëmijëve tanë sulmet terroriste?
Ju falenderoj nëse më pergjigjeni para pasdites, sepse më kthehet djali në shtëpi dhe dua ta bëj këtë bisedë sepse mu duk tmerrësisht i trembur!
Ju faleminderit të gjithave paraprakisht!

Për fëmijët e moshës parashkollore

Para se të kenë mbushur 6vjec fëmijëve nuk duhet t'i vëmë në dijeni për këto lajme. Fëmijët nën 5 vjeç mund t'i ngatërrojnë faktet me frikerat e tyre, ndaj duhet t'u themi hollësi duke u përgjigjur pyetjeve të drejtpërdrejta.

Fëmijët nga 6-10 vjeç

Sipas Harold Koplewicz, president i Child mind institute, “në këtë moshë të njohësh faktet dite të lehtesosh ankthin”.
Është mirë të mos e teprojmë me shpjegime si psh. numri i viktimave, apo përdorimi i fjalëve të frikshme. Sipas psikoanalistes francese Claude Halmos është e kotë të flasësh për grupin Shtet islamik, të besimeve fetare dhe operacionet ushtarake në Siri.
Ne duhet t'i qetësojmë dhe t'i sigurojmë femijet tanë duke u thënë se prindërit trishtohen jo se ka një kërcënim të drejtpërdrejtë ndaj familjes, por vetëm për viktimat.
Është e rëndësishme t'i bëjmë fëmijët tanë të ndihen të sigurte.
Këto sulme janë të rralla dhe "të këqinjtë" janë kapur nga policia dhe të plagosurit do shërohen.

Femijet nga 10-14 vjeç

Fëmijët e kësaj moshe mund të kërkojnë të njohin më shumë hollësi, por ekspertët thonë se është më mirë të mos jepen shumë. Është mirë që të pyeten fëmijët se çfarë kanë dëgjuar për këtë dhe si ndihen, duhet të dinë se mund të trishtohen, edhe pse nuk e ndjejnë te nevojshme të derdhin lot.
Fëmijët mund të tregohen indiferentë ose duan të kalojnë pak kohë vetëm, por mund të jetë e nevojshme t'u japim forcë të shprehin frikerat e tyre dhe mund të flasim se bashku për mënyrën si të sillemi në raste urgjente.

Adoleshentët nga 14-18 vjeç.

Ne këtë moshë djemtë dhe vajzat marrin njohuri përmes rrjeteve sociale dhe network, për këtë arsye duhet t'i ndihmojmë të dallojnë faktet nga gënjeshtrat, trillimet dhe ndërtimet me dorë.
Adoleshentët mund të mos pranojnë të bisedojnë për këto gjëra, ndaj është mirë t'a bëjmë këtë bisedë kur jemi duke bërë dicka tjetër se bashku me ta, sipas Koplewicz.
Nuk do arrijnë të ndihen tërësisht të sigurte nga sulmet terroriste, ndaj duhet t'i ftojmë, që ta konsiderojnë mundësinë e një urgjence dhe të vendosim së bashku si të veprojmë, çfarë duhet të bëjnë nëse nuk arrijnë dot në shtëpi ose si të lidhen me prindërit.
Në këtë moshë është shumë e rëndësishme t'u flitet adoleshentëve për përdorimin e dhunës, për efektet dhe alternativat.