Një nënë me fëmijë autik nuk ka zgjidhje tjetër veç të bëhet heroinë

E kam zbuluar kohët e fundit faqen tuaj dhe vendosa t'ju shkruaj jo më shumë për këshilla, sesa për ta ndarë me ju historinë e jetës sime. Edhe pse vajza ime 5 vjeçare bart sindromën e spektrit të autizmit, jam një mama e lumtur dhe me fat. Periudha ku jam lëkundur më shumë se kurrë në jetën time.... kjo histori filloi 3 vjet më parë. Me keqardhje e them se gabimi më i madh që bëmë me vajzën ishte se dëgjuam fjalët e të tjerëve, hë se i vjen goja vonë. Kur iu diagnostikua sindroma e Autizmit, çdo nënë besoj se e kupton vetë që mu shemb qielli mbi kokë. 

Frika, tmerri, ankthi mbushën menjëherë jetën time ato kohë dhe sidomos më buçiste në kokë pyetja çekan: a do t'ja dal, si do t'ja dal, si do bëj, do veproj gabim? 

Si unë dhe im shoq na u desh të mblidhnim forcat tona, që nuk mendonim se i kishim, por sot e kuptoj, se çdo nënë në vendin tim do ta gjente guximin dhe do të bëhej një heroinë e vogël, një luaneshë që lufton me thonj për ti dhuruar fëmijës së saj një jetë të barabartë me atë të fëmijëve të tjerë. Kam kërkuar qendrat shëndetësore, terapistët më të përmendur, shkollat që plotësonin kushtet më të mira për të pritur fëmijët me këtë sindromë në Angli, ndonjëherë humbja durimin dhe nervozohesha, ndonjëherë më dukej se do lajthisja, ndonjëherë më dukej se nuk do të ngrihesha më, por jo shumë shpejt e kuptova, që forcën duhet ta gjeja vetëm tek vetja dhe familja, asgjëkund tjetër. Tani jam nëna më e lumtur në botë tek shoh rezultatet dhe përmirësimin e vajzës sime. Ajo ka filluar të flasë dhe unë ndihem një heroinë, jo sepse mblodha veten, por e përsëris për nënat, që kanë apo mund të kenë një ditë fatin e keq të përballen me sindromën e spektrit autik, se janë në vetvete heroina edhe pse nuk mendojnë kështu! Para një jave terapisti i vajzës më tha, që i ka të gjitha mundësitë të bëjë jetë normale, si gjithë moshatarët e vet. Shpresoj që shumë nëna që më lexojnë në këto momente të kujtohen për këto që po them, kur të ndihen të gjunjëzuara nga jeta dhe rrjedha e saj e padrejtë. Të mos harroni nëna luanesha, që forcën do ta gjeni tek vetja dhe dashuria e përkujdesi i njerëzve më të dashur. 

Uroj që ky vit i ri të jetë i mbushur me lumturi dhe arritje, sepse forca për të mbajtur të fortë një familje është e fshehur, vetëm tek ne nënat heroina! 

Kjo histori ka mbërritur në This email address is being protected from spambots. You need JavaScript enabled to view it.  

Do të lësh një koment kësaj nëne guximtare? Shkruani në komentet që pasojnë këtë histori!